AS TIC NA EDUCACIÓN

A continuación, realizarei unha reflexión acerca das TIC na educación que espero que vos guste. Para comezar, inicio o meu comentario realizando unha visión xeral das TIC. As TIC (Tecnoloxías da Información e a Comunicación) foron gañando un oco nas nosas vidas, orixinando moitas mutacións na sociedade, na cultura e na economía. A humanidade foi alterando significativamente os modos de comunicar, de entreter, de traballar, de negociar, de gobernar e de socializar, sobre a base da difusión e uso das TIC a escala global. É universalmente recoñecido tamén que as TIC son responsables de aumentos en produtividade, anteriormente inimaxinables, nos máis variados sectores da actividade empresarial e de maneira destacada nas economías do coñecemento e da innovación, por non falar da pegada que está deixando na educación. Resulta evidente, entón, que as TIC teñen un protagonismo na nosa sociedade e que a educación debe axustarse e dar respostas ás necesidades de cambio da sociedade.

Precisamente, para favorecer este proceso que se empeza a desenvolver dende as contornas educativas informais, a escola como servizo público ha de garantir a preparación das futuras xeracións e para iso debe integrar a nova cultura: alfabetización dixital, material didáctico, fonte de información, instrumento para realizar traballos, etc.

Na actualidade, moitos mestres e mestras solicitan e queren contar con recursos informáticos e con Internet para a súa docencia, dando resposta aos retos que lles expoñen estas novas canles de información.Os profesores e as profesoras  teñen a posibilidade de xerar contidos educativos en liña cos intereses ou as particularidades de cada alumno/a, podendo adaptarse a grupos reducidos ou mesmo a un estudante individual. Ademais, o/a  docente ha de adquirir un novo rol e novos coñecementos, desde coñecer adecuadamente a rede e as súas posibilidades ata como utilizala na aula e ensinar aos seus alumnos e alumnas os seus beneficios e desvantaxes.

O profesorado manifesta que o uso das TIC ten beneficios moi positivos para a comunidade escolar, a súa alta implicación coas TIC mellorou a súa satisfacción persoal, o rendemento no seu traballo e a relación co alumnado, debido á ampla gama de posibilidades que ofrecen.

Se queremos que a nosa sociedade non só sexa da información, senón tamén do coñecemento, será necesario traballar desde un enfoque pedagóxico para realizar un uso adecuado das TIC. Para levar a cabo estas accións necesítase un profesorado formado neste ámbito, que involucre ás TIC no ensino do seu alumnado e os oriente nun uso adecuado delas. Tamén convén destacar a necesidade de levar a cabo unha nova campaña de información e formación adecuada para o alumnado, proxenitores e profesorado no ámbito das TIC.

No ámbito educativo o uso das TIC non se debe limitar a transmitir só coñecementos, aínda que estes sexan necesarios, senón que debemos saber distinguir en que nos axudan e en que nos limitan, para poder actuar en consecuencia. Este proceso debe estar presente e darse de maneira integrada na familia, na escola e na sociedade. As TIC na educación permiten o desenvolvemento de diferentes competencias posto que estamos cunha xeración de nenos/as aos cales lles gusta todo na virtualidade por diversos motivos e eles mesmos demándano. A través das TIC conséguese utilizar medios informáticos almacenando, procesando e difundindo toda a información que o alumno e a alumna necesita para o seu proceso de formación.